30 сакавіка 2023 года ў рамках рэалізацыі мэты ўстойлівага развіцця «Забеспячэнне адкрытасці, бяспекі, надзейнасці і экалагічнай устойлівасці гарадоў і населеных пунктаў» ў абласной навуковай бібліятэцы імя Я. Карскага адбылося ўрачыстае адкрыццё выставы «Родныя вобразы», прысвечанай Дню абароны Зямлі, на якой прадстаўлены дыпломныя і курсавыя работы студэнтаў Купалаўскага ўніверсітэта кафедры выяўленчага мастацтва факультэта мастацтваў і дызайну. Наведвальнікі атрымалі сапраўдную асалоду ад экспазіцыі, наскрозь працятай нацыянальным каларытам, прыгажосцю і чароўнай цеплынёй роднага краю.

Загадчык кафедры выяўленчага мастацтва Анатоль Іванавіч Бурчык адзначыў важнасць такіх выстаў для пачынаючых мастакоў і распавёў пра задуму карцін. Словы падзякі ў адрас арганізатараў накіравала намеснік дэкана факультэта мастацтваў і дызайну Гродзенскага дзяржаунага ўніверсітета імя Янкі Купалы Наталля Паўленка, якая падкрэсліла, што выставачная пляцоўка ў бібліятэцы дае магчымасць маладым мастакам не толькі паказаць свой талент шырокай аўдыторыі, але таксама імкнуцца ўдасканальваць свае веды і навыкі ў мастацкай дзейнасці.

Убачыць «Родныя вобразы» у выкананні таленавітых гродзенцаў можна да 1 мая ў галоўным корпусе бібліятэкі па адрасе: вул. Карбышава, 17 (2 паверх).